दाङ । लुम्बिनी प्रदेशका मुख्यमन्त्री लिला गिरीले सपथ ग्रहण गरे लगत्तै पदभार पनि ग्रहण गरेका छन् । आज लुम्बिनी प्रदेशको स्थाही राजधानी दाङको राप्ती उपत्यकामा अवस्थित मुख्यमन्त्री तथा मन्त्री परिषदको कार्यालयमा पदभार ग्रहण गरेका हुन् ।
संविधानको धारा १६८ को उपधारा २ अनुसार प्रदेश प्रमुख अमिक शेरचनले गिरीलाई मुख्यमन्त्री नियुक्त गरी आज विहिबार सपथ ग्रहण गराएका थिए । गिरीसँगै एमाले संसदीय दलका उपनेता चेतनारायण आचार्य र नेकपा माओवादी केन्द्रको तर्फबाट नेतृ कृष्णा केसीले विनाविभागीय मन्त्रीको रुपमा सपथ लिएका छन् । लुम्बिनी प्रदेशका ५८ जना सांसदहरुको सहमतीमा सरकार गठन भएको हो । एमाले–माओवादीसँगै राप्रपा, जसपा, लोसपा, नागरिक उन्मुक्ति, जनमत पार्टी र २ स्वतन्त्र सांसदहरुको समेत समर्थन रहेको छ ।
यस्तै नवनियुक्त मुख्यमन्त्री गिरीले पदभार गरेपछि बसेको मन्त्रिपरिषदको बैठकले लुम्बिनी प्रदेशका प्राथमिकता निर्धारण र कार्यान्वयन तथा मन्त्रालयको संख्या घटाउने निर्णय गरेको हो । बैठकले सरकारको प्रवक्ताको जिम्मेवारी मन्त्री चेतनारायण आचार्यलाई दिने निर्णय गरेको छ ।
