काठमाडौं : नेपालको १२ औं राष्ट्रिय जनगणना २०७८ को नतिजा सार्वजनिक भएको छ।
शुक्रवार काठमाडौंमा १२ औं राष्ट्रिय जनगणना २०७८ को नतिजा सार्वजनिक गरिएको हो। नेपालको कुल जनसंख्या २ करोड ९१ लाख ६४ हजार ५७८ रहेको छ जसमा पुरुष १ करोड ४२ लाख ५३ हजार ५५१ रहेका छन् भने महिला १ करोड ४९ लाख ११ हजार २७ रहेको छ। नेपालमा पुरूष भन्दा महिलाको जनसंख्या करिब ६ लाख ५० हजार बढी छ।
वि.स २०६८ मा २ करोड ६४ लाख ९४ हजार ४ सय ८१ जनसंख्या रहेको थियो। यो हिसाबले १० वर्षमा करिब २७ लाख जनसंख्या थपिएको छ।
यस पटक वागमती र मधेस प्रदेशमा करिब २१ प्रतिशत जनसंख्याको बसोवास छ, जसमा कर्णाली प्रदेशमा सबैभन्दा कम छ।
कार्यक्रममा प्रधानमन्त्री पुष्पकमल दाहाल उपस्थित हुनुहुन्छ। प्रधानमन्त्री दाहालले नै नेपालको १२ औं राष्ट्रिय जनगणना २०७८ को नतिजा सार्वजनिक गर्नुभएको हो।
त्यस्तै भक्तपुरमा सबै भन्दा बढी जनसंख्या वृद्धि भएको छ भने रामेछापमा सबैभन्दा कम जनसंख्या वृद्धि भएको छ। नेपालमा २ हजार ९२८ जना अन्य लिंगीको बसोवास रहेको जसमा वागमती प्रदेशमा कुल संख्याको एक तिहाईको बसोवास छ।
