नविन रसाईली अर्घाखाँची । नेपाल कम्युनिष्ट पार्टी बहुमतका केन्दिय संयोजक धर्मेन्द्र बास्तोला (कन्चन) ले नेत्र विक्रम चन्द –विप्लव) ले पार्टीको विधि विधानलाई छाडेर सत्ताको पछि लाग्नाले पार्टी विभाजन भएको बताएका छन् । आइतबार जनपत्रकार संगठन अर्घाखाँचीको आयोजनामा भएको पत्रकार भेटघाट कार्यक्रममा उनले यस्तो बताएका थिए ।
कन्चनले विप्लव संसदिय व्यवस्था भित्र प्रवेश गर्न खोेजेको बताउदै विप्लव पार्टीको निर्णय विपरित गएको समेत बताएका थिए । पार्टीको केन्द्रिय बैठकमा चुनावमा नजानेको पक्षमा ४५ जना सदस्य र चुनावमा जानेको पक्षमा २७ जना सदस्य रहेको रहेको बताउदै चुनावमा नजानेको पक्षमा बहुमत भएकाले पार्टी विभाजन पछी पार्टीको नाम नै नेकपा बहुमत राखिएको जानकारी दिए ।
यस्तै उनले फरक प्रसंगमा भनेका छन् “जननिर्वाचित कार्यकारी राष्ट्रपति बनाउनुपर्छ, अब सांसदबाट मन्त्री बनाउन नहुने भन्दै विज्ञ व्यक्तिलाई मात्रै मन्त्री बनाउने, व्यवस्थापिका, न्यायपालिका र कार्यपालिका जनताबाटै निर्वाचित हुनुपर्ने हाम्रो पार्टीको धारण हो”। उनले आफ्नो पार्टी बृहत कम्युनिष्ट एकताको पक्षमा रहेको पनि बताए ।
कार्यक्रममा नेपाल कम्युनिस्ट पार्टी बहुमतका कपिलवस्तु, अर्घाखाँची ईन्चार्ज शेरमान, पार्टीका शेक्रेटरी नवीन खड्का लगाएतको उपस्थिति रहेको थियो । भेटघाट कार्यक्रम जनपत्रकार संगठनका केन्द्रीय सदस्य अनिल नेपालीको अध्यक्षता, अयन विकको सञ्चालनमा सम्पन्न भएको हो ।
