काठमाडौं । नेकपा एकीकृत समाजवादीले प्रतिनिधिसभा बैठकमा एमसीसी सम्झौता टेवल भए पास हुन नदिने उद्घोष गरेको छ ।
बुधबार बस्ने प्रतिनिधिसभा बैठकमा सरकारले एमसीसी सम्झौता टेवल गर्ने अन्तिम तयारी गरेपछि एकीकृत समाजवादीले यथास्थितिमा पास हुन नदिने उद्घोष गरेको हो ।
एकीकृत समाजवादीका प्रवक्ता जगन्नाथ खतिवडाले संशोधन बिना एमसीसी पास हुन नदिने बताउनुभएको हो ।
‘एमसीसी पास हुँदैन र पास गराउँदैनौं । पास गर्ने वातावरण पनि बन्न दिदैनौं,’ एकीकृत समाजवादीका प्रवक्ता खतिवडाले भन्नुभयो, ‘हाम्रो पूर्ववत अडान यथावत छ । संशोधन विना एमसीसी पास हुनै सक्दैन ।’
प्रतिनिधिसभा बैठक बुधबार बस्दै छ । सरकारको नेतृत्व गरिरहेको नेपाली कांग्रेसले बुधबारको बैठकमा एमसीसी टेवल गर्ने तयारी गरिरहेको छ ।
कांग्रेसको मंगलबार विहान बसेको संसदीय दलको बैठकले पनि एमसीसी अनुमोदनको लागि प्रतिनिधिसभा बैठकमा टेवल गर्न सहमति दिएको छ ।
