नविन रसाईली अर्घाखाँची । अर्घाखाँचीको सन्धिखर्क नगरपालिकाका २२ जना जनप्रतिनिधिहरुले पदबाट राजीनामा दिएका छन् । शुक्रबार सन्धिखर्क नगरपालिकाका प्रमुख सहित वडा अध्यक्ष, वडा सदस्य गरी २२ जनाले पदबाट राजीनामा दिएका सन्धिखर्क नगरपालिकाका सुचना अधिकारी मञ्जु खनालले जानकारी दिनुभयो ।
राजीनामा दिनेहरुमा नगर प्रमुख कमल प्रसाद भुसाल सहित वडाध्यक्षहरुमा वडा १ का अध्यक्ष युवराज बञ्जाडे, वडा–२ का अध्यक्ष मोतिजंग रायमाझी वडा नंं ३ का लिलाराम गौतम, वडा नं. ४ का कृष्णप्रसाद श्रेष्ठ, ६ का कृष्णबहादुर आचार्य, ८ नं. वडाका कावा अध्यक्ष नारायण प्रसाद अर्याल, वडा नं. १० का लक्ष्मीनारायण चुदाँली, ११ का धुर्बराज आचार्य र वडा नं. १२ का अध्यक्ष नारायण खड्का रहेका छन् । सुचना अधिकारी खनालका अनुसार राजीनामा दिने क्रम वैशाख ११ गतेसम्म रहिरहने छ ।
यस्तै राजिनामा दिने क्रममा नगरप्रमुखले प्रयोग गरेको गाडीको चावी तथा ल्पापटप प्रमुख प्रमुख प्रशासकीय अधिकृतलाई हस्तान्तरण गर्नुभएको हो । नगरपालिकाले सम्पुर्ण नगरसभा सदस्यलाई कदर पत्र समेत प्रदान गरेको छ ।
निर्वाचन आयोगले जनप्रतिनिधि पुनः चुनाव लड्न चाहेमा पदबाट राजीनामा दिनुपर्ने बाध्यकारी व्यवस्था गरेको छ । त्यहीअनुरुप आउँदो पालिका चुनावमा बहालवाला जनप्रतिनिधिले राजीनामा दिएर मात्र उम्मेदवार बन्न पाउने भएका छन् । उम्मेदवारी दिँदा राजीनामा दिनुपर्ने चुनावी आचारसंहिताको प्रावधान विरुद्धमा परेको रिट सर्वोच्च अदालतले खारेज गरिदिएपछि जनप्रतिनिधिले चुनाव लड्न राजीनामा दिनुपर्ने छ ।
