नवीन रसाइली अर्घाखाँची । अर्घाखाँची जिल्लामा अब दौडिन्छ अर्घाखाँची भन्ने मुलनाराका साथ प्रथम राष्ट्रिय अर्घाखाँची रोडरेस २०७८ हुने भएको छ । आज मंगलबार बिहान सन्धिखर्कमा पत्रकार सम्मेलन गरि प्रथम राष्ट्रिय अर्घाखाँची रोडरेस हुन लागिको आयोजकले जनाएको हो ।
सबैका लागि खेलकुद, स्वास्थका लागि खेलकुद, शारीरिक र मानसिक विकासका लागि खेलकुद, राष्ट्र र राष्ट्रिय एकताका निम्ति खेलकुद अपरिहार्य हुन्छ । अब दौडिन्छ अर्घाखाँची भन्ने मुल नाराका साथ अन्तर्राष्ट्रिय स्तरमा अर्घाखाँचीलाई परिचित गराउनको निम्ति खेलकुद संचालन गर्न लागिएको हो ।
प्रथम राष्ट्रिय अर्घाखाँची रोड रेस प्रतियोगितामा बच्चा देखि युवा र युवा देखि बृद्वा सम्मले भाग लिन पाउने स्पोर्टस भ्वाइसका अध्यक्ष पृथ्वी थापाले बताए । उनलेे खुल्ला दौड महिला पुरुष ५ किलोमिटर, भेन्ट्रान्स ४० वर्ष माथिका पुरुष ५ किलोमिटर, स्कुल जाने उमेर समुहको लागि ५० मिटर, १०० मिटर, १५० मिटर, २०० मिटर र ३०० मिटर दौड हुने जानकारी दिए । सँगै जुम्बा डान्स सहित नेपाली मौलिक संस्कृतिलाई झल्काउने पञ्चेबाजाको प्रस्तुति समेत हुने उनको भनाइ थियो । प्रतियोगितामा १००० खेलाडीहरुको सहभागीता हुने गरि व्यवस्था मिलाइएको समेत अध्यक्ष थापाले जानकारी दिए । सहभागी खेलाडीलाई अब दौडिन्छ अर्घाखाँची भन्ने नारा सहितको ड्रेस, प्रमाणपत्र र विजेता खेलाडीलाई नगत पुरस्कारको व्यवस्था गरिएको उनलेे बताए ।
उल्लेखित खेलहरु सम्पन्न गर्नको लागि नेपालका पहिलो अन्तर्राष्ट्रिय पदक विजेता जितबहादुर केसी, म्याराथन किर्तिमानी धावक बैकुण्ठ मानन्धर, मुख्य प्रशिक्षक चन्द्रबहादुर गुरुङ, लगायतको उपस्थिति रहने अायोजकले विज्ञप्ति मार्फत जानकारी दिएको छ । ‘विश्वमा आयोजना हुने विविध खेलहरु मध्ये रोड रेस पनि एक महत्त्वपूर्ण खेल हो । बर्लिन देशले वर्षको एकपटक स्वास्थ्यका लागि खेलकुद भनि १० औं लाख मानिसहरु सडकमा हिडाउने र दौडाउने गर्दछ । जुन देश आज म्याराथनका नामले परिचित छ । यस प्रकारका खेलहरु विश्वका अन्य देशले पनि संचालन गरि आफ्नो देशलाई संसारभर परिचित गराउनुका साथै नागरिककालाइ स्वस्थ राख्न प्रयत्न गरिरहेका हुन्छन् । हाम्रो देशमा आयोजना हुने खेलहरुमध्ये गोरखमा हुने लिगलिग दौडले ठुलो महत्त्व राखेको छ । यसरी संसारमाझ हाम्रो देशलाइ पनि परिचित गराउनको लागि यो खेलको आयोजना गरिएको हो’ विज्ञप्तिमा भनिएको छ ।
यस्तै कार्यक्रम गर्न करिव १६ लाख ५० हजार अनुमानित खर्च हुने जनाइएको छ । अर्घाखाँची जिल्लाको पहिचान र खेल तथा पर्यटन विकासको निम्ति जिल्लाका ६ वटै स्थानीय तह, सम्पुर्ण संघ संस्थाहरु र सहयोगीहरुको सहयोगको अपेक्षा गरिएको आयोजकले जनाएको छ । खेल फागुन २७ र २८ गते हुने पनि जानकारी प्राप्त भएको छ ।
पत्रकार सम्मेलनमा समाजसेवी ज्यूहरु, पत्रकार महासंघका अध्यक्ष सहित जिल्लाका विभिन्न मिडियाका पत्रकारहरुको उपस्थिति रहेको थियो । कार्यक्रम स्पोर्टस भ्वाइसका अध्यक्ष पृथ्वी थापाको अध्यक्षता र अखिल छैठौंका जीवन नेपालीको संचालनमा सम्पन्न भएको थियो ।
