काठमाण्डौ । सत्तारुढ गठबन्धन दल गठबन्धन जोगाउने र एमसीसी संझौता गर्ने सहमती नजिक पुगेका छन् । एमसीसी सम्झौतामा भएका केही बुँदामा व्याख्यात्मक घोषणासहित संसदबाट पारित गर्न उनीहरु सहमत भएका छन् ।
सनिवार बेलुका अबेरसम्म भएको छलफलमा माओवादी केन्द्र र एकीकृत समाजवादीका नेताहरु प्रश्न उठेका विषयहरुको संसदबाट व्याख्यात्मक घोषणासँगै अमेरिकी सहयोग परियोजना एमसीसीको पक्षमा मतदान गर्न सहमत भएका हुन् । एमसीसी सम्झौतासम्बन्धी प्रस्तावसँगै पूरक प्रस्ताव जोड्ने र त्यसले विवादित र अस्पष्ट प्रावधानको व्याख्या गर्ने नेताहरुको दाबी छ ।
पूरक प्रस्तावमा एमसीसी सहयोग विकास अनुदान हो । यो हिन्द प्रशान्त रणनीति तथा अन्य सैन्य सङ्गठनको अङ्ग होइन । कुनै पनि अवस्थामा नेपालको कानुन सर्वोच्च हुनेछ भनेर स्पष्ट घोषणा गरिने उल्लेख गर्ने तयारी छ ।
यस विषयमा औपचारिक सहमति बनाउन दुवै दल आन्तरिक छलफलमा जुट्दै छन् । अहिले बिहान माओवादी केन्द्रीय कार्यालयको विस्तारित बैठक बस्दैछ । यस्तै, एकीकृत समाजवादीको पनि स्थायी कमिटी बैठक बस्दैछ । एमसीसीबारे औपचारिक निर्णय गर्न प्रधानमन्त्री शेरबहादुर देउवाले बिहान ९ बजे गठबन्धनको बैठक बोलाउनु भएको छ ।
९ बजेअघि नै पार्टी भित्र सहमति जुटाउन दुई दल जुट्न लागेका हुन् । आज कुनै नाटकीय मोड नआएमा एमसीसी सम्झौताबारे सत्ता गठबन्धन भित्र सहमति हुने सम्भावना छ । तर, माओवादी केन्द्र र एकीकृत समाजवादी एमसीसीको पक्षमा मतदान गर्न सहमत नभएमा गठबन्धन टुट्न सक्ने छ र एमालेसँग सहकार्य हुनसक्ने नेपाली कांग्रेसका नेताहरुले बताएका छन् । यसका लागि प्रधानमन्त्री देउवाका नजिकका नेताहरुले एमाले नेताहरुसँग निरन्तर छलफल गरिरहेका छन् । आज बस्ने प्रतिनिधि सभा बैठकमा एमसीसीमाथि छलफल हुने सम्भावना छ ।
सत्ता गठबन्धन दलहरुबीच औपचारिक सहमति बनेमा आजकै बैठकमा पारित गर्ने र त्यसपछि दफावार छलफल गरेर सके तत्कालै नसके भोलि अनुमोदन गराउने प्रधानमन्त्री देउवाको तयारी छ । संसद् बैठक दिउँसो १ बजे बस्दैछ।
