नविन रसाईली अर्घाखाँची । मालारानी गाउँपालिका अध्यक्ष दल बहादुर भट्टराई गाउँपालिका अध्यक्षमा निर्वाचित भएपछि पदभार ग्रहणको क्रममा दिर्घ रोगीलाई नि:शुल्क औषधी वितरण गर्ने प्रतिबद्धता जनाएका थिए । अध्यक्ष भट्टराईले गरेको निशुल्क औषधी वितरणको प्रतिबद्धता अहिले औपचारिक रुपमा शुभारम्भ भएको छ । सोमबार मालारानी गाउँपालिकाका सबै वडाहरुमा रहेका स्वास्थ्य संस्थाबाट दिर्घरोगीलाई निशुल्क औषधी वितरण गरियो । औषधी उच्च रक्त चाप, मधुमेह र क्षारे रोगका बिरामीहरुलाई वितरण गरिएको हो ।
मालारानी ४ खनमा रहेको स्वास्थ्य चौकीमा अध्यक्ष भट्टराई आफैले औषधी वितरण गरि कार्यक्रमको सुभारम्भ गरेका थिए । औषधी वितरण कार्यक्रमको शुभारम्भ गर्दै अध्यक्ष भट्टराईले दिर्घरोगीहरूलाइ यो कार्यक्रम फलदायी रहने बताउदै कार्यक्रमको प्रभावकारिताको आधारमा आगामी दिनमा निरन्तर रूपमा संचालन गरिने बताए । “दिर्घरोगीहरुलाई यो कार्यक्रमले सहयोग पु¥याउने छ” उनले भने “पालिकामा रहेका दिर्घरोगीहरुको समस्यालाई मध्यनजर गर्दै हामीले यो कार्यक्रमको सुरुवात गरेका हौं, यसको प्रभावकारी कार्यन्वयन हुनेमा हामी विश्वस्त छौं ।”
यस्तै मालारानी ३ को स्वास्थ्य चौकीमा उपाध्यक्ष दिपा पोख्रेल र अन्य वडाहरुमा सम्बन्धीत वडा अध्यक्षहरुले बिरामीलाई औषधी वितरण गरि कार्यक्रमको सुभारम्भ गरेका थिए । औषधी प्रत्येक महिनाको १० गते र २५ गते गरि दुई चरणमा वितरण गरिने मालारानी गाउँपालिका स्वास्थ्य शाखा प्रमुख भविश्वर खनालले जानकारी दिए । खनालले बिरामी आफ्नो वडाको स्वास्थ्य संस्थामा गएर औषधी लिन सक्ने बताए । उनले भने “बिरामी आफै स्वास्थ्य संस्थामा जानुपर्ने छ, यदि जान नसक्ने अवस्था भएको अवसरमा डाक्टरले दिएको कार्ड र परिचय खुल्ने कागजात लिएर उहाँका आफन्त जान सक्नेछन् ।”
औषधी सर्वधारण सम्म पुग्न सके कार्यक्रम प्रभावकारी हुने थियो । गाउँपालिकाले आगामी दिनमा पनि यो कार्यक्रमलाई निरन्तर दिन आवश्यक छ ।
