अराजक देवता
निम्बतरु
देवताको वाहन सम्म भएको भए म
नक्कली सिङ हालेर भएपनि
तिनीहरलाई जात्रामा झैं ढुङ्गामुढा गरिसक्थें
रातभर रथ तानातान गर्दा
जात्रालु जहाँ थाक्छन्
तान्नेको कोरमम पुग्दैन
तब जहाँको तहीँ भताभुङ्ग छोडिन्छ
सम्बन्धित ठाउँमा नपुग्दै देश पनि अलपत्र
आज रातभर गणेशको वाहन एक सिँगे मुसाले
घरभरि बिध्वंस
उता बिहानभर शिवको वाहन साँढेले
पाक्न लागेको बाली सोत्तर
भैरवको वाहन कुकुरले भित्तै पिच्छे जलअभिषेक गरेछ
एक दिन देवीदेवताका वाहनहरुको सम्मेलन रहेछ
म रुखको आड लगाएर हेरिबसें
यमराजको वाहन भैंसी
इन्द्रको वाहन हात्ती
लक्ष्मीको वाहन उल्लु
कालरात्रीको गधा
कुबेरको बेइमान वाहन मानिस
सूर्यको घोडा
अग्निको बाख्रो
इत्यादि को इत्यादि
टोकाटोक हानाहान गरिरहेथे
देवता अराजक भएजस्तो
वाहन नै देवता भएजस्तो
अराजकता देखाइरहेथे
तब देश बीचबाटामा नै भताभुङ्ग /अलपत्र
