धन्चौरमा जारी खुला क्रिकेट प्रतियोगिताको आज तेस्रो दिन, प्युठान र गुल्मीबीच पहिलो प्रतिस्पर्धा हुँदै

हृदय भुसाल अर्घाखाँची ।अर्घाखाँचीको भूमिकास्थान नगरपालिका–१० धन्चौरस्थित आरिचौर खेलमैदानमा जारी खुला क्रिकेट प्रतियोगिताको आज तेस्रो दिनका खेल बिहान ११ बजेदेखि सुरु हुने भएका छन्।
आज हुने पहिलो खेलमा प्युठान र गुल्मीका टिमबीच प्रतिस्पर्धा हुनेछ भने दोस्रो खेलमा बुटवल र प्युठानका टिम आमनेसामने हुने सामाजिक तथा राजनीतिक व्यक्तित्व लिलबहादुर जिसीले जानकारी दिनुभएको छ।
यसअघि प्रतियोगिताको पहिलो चरणमा १० टिमले प्रतिस्पर्धा गरिसकेका छन्। पहिलो चरणका खेलबाट मालारानी टिम, आयोजक बी र सी टिम, सितगंगा टिम तथा गौचौर युवा समाजको टिम विजयी हुँदै अर्को चरणमा प्रवेश गरेका छन्।
आजका खेलहरू थप प्रतिस्पर्धात्मक र रोचक हुने आयोजक ऋषिकेश आलेले बताउनुभयो। उहाँका अनुसार प्रतियोगितामा सहभागी खेलाडीहरूको उत्साह र दर्शकको चासोले खेलमैदानमा थप रौनकता बढाएको छ।
मुनलाइट युवा क्लब र धन्चौर युवा समाजको सहकार्यमा आयोजना गरिएको प्रतियोगितामा विभिन्न क्षेत्रका टिमहरूको सहभागिता रहेको छ। स्थानीय स्तरमा क्रिकेट खेलको विकास, खेलाडीको प्रतिभा प्रस्फुटन तथा आपसी सद्भाव र खेलकुद संस्कृतिको प्रवर्द्धन गर्ने उद्देश्यले प्रतियोगिता आयोजना गरिएको हो।