धन्चौरमा क्रिकेट प्रतियोगिताको एक कार्यक्रमका बीच उद्घाटन

हृदय भुसाल अर्घाखाँची। अर्घाखाँचीको भूमिकास्थान नगरपालिका–१० धन्चौरस्थित आरिचौर खेलमैदानमा एक लाख रुपैयाँ राशिको खुला क्रिकेट प्रतियोगिता आजदेखि सुरु भएको छ। प्रतियोगिताको उद्घाटन विशेष कार्यक्रमका बीच भूमिकास्थान नगरपालिकाका नगरप्रमुख झबिलाल थापाले गर्नु भएको हो।
प्रतियोगिताको उद्घाटन गर्दै नगरप्रमुख थापाले खेलकुदले आपसी एकता, सद्भाव र भाइचारालाई कायम राख्न महत्वपूर्ण भूमिका खेल्ने बताउनुभयो। उहाँले खेलकुदका माध्यमबाट पर्यटन प्रवर्द्धनसँगै स्थानीय खेल  क्षेत्रको विकासमा समेत अतुलनीय योगदान पुग्न सक्ने धारणा व्यक्त गर्नुभयो।अर्घाखाँची जिल्लाको पर्यटकिय  क्षेत्रमा क्रिकेट प्रतियोगिता आयोजना हुनु गौरवको विषय हो। खेलकुदले यस क्षेत्रको पर्यटन विकासमा टेवा पुर्‍याउनुका साथै पाथीभरा मन्दिर, चिया बगान र होमस्टेको विकास तथा प्रवर्द्धनमा समेत सहयोग पुर्‍याउनेछ,” नगरप्रमुख थापाले भन्नुभयो।उहाँले खेलमैदानमा आवश्यक शौचालय निर्माणलगायत अन्य भौतिक पूर्वाधार विस्तारका लागि आवश्यक योजना बनाई अगाडि बढ्ने बताउनु भयो । साथै, प्रतियोगितामा सहभागी खेलाडीलाई अनुशासित र मर्यादित ढङ्गले आफ्नो प्रतिभा प्रस्तुत गर्न आग्रह गर्दै प्रतियोगिताको सफलताको शुभकामना व्यक्त गर्नुभयो।
कार्यक्रममा भूमिकास्थान नगरपालिका–१० का वडाध्यक्ष खगेश्वर पन्थीले प्रतियोगिताको सफलताको शुभकामना व्यक्त गर्नुभयो। कार्यक्रममा जनप्रतिनिधि, सामाजिक तथा राजनीतिक व्यक्तित्व, समाजसेवी, खेलप्रेमी र सहयोगीहरूको आतिथ्यता रहेको थियो।
मुनलाइट युवा क्लबको आयोजनामा सञ्चालन भएको प्रतियोगिताको उद्घाटन समारोह क्लबका अध्यक्ष सन्दीप गैरेको अध्यक्षता, कृष्ण गैरेको स्वागत मन्तव्य तथा लिलबहादुर जिसीको सञ्चालनमा सम्पन्न भएको थियो।
आयोजकका अनुसार प्रतियोगितामा १४ टोलीको सहभागिता रहनेछ। प्रतियोगिताको विजेताले एक लाख रुपैयाँ र उपविजेताले ५० हजार रुपैयाँसहित मेडल तथा प्रमाणपत्र प्राप्त गर्नेछन्।
स्थानीय क्षेत्रमा खेलकुदको विकास, युवाको प्रतिभा पहिचान र खेल पर्यटनको सम्भावना उजागर गर्ने उद्देश्यले आयोजना गरिएको प्रतियोगिताले धन्चौर क्षेत्रको पहिचान विस्तार गर्न तथा स्थानीय आर्थिक गतिविधि चलायमान बनाउन सहयोग पुग्ने अपेक्षा गरिएको छ। मुललाईट युबा क्लबका अध्यक्ष सन्दीप गैरेले बताउनु भयो ।