नविन रसाईली अर्घाखाँची । अर्घाखाँची जिल्लाको शैक्षिक धरोहर मानिने पाणिनी बहुमखी क्याम्पस विगत ४ वर्षदेखि संचालक समिति विहिन छ । यस अघि ०७२ सालमा चेतनारायण आचार्यको अध्यक्षतामा संचालक समिति बनेको थियो । क्याम्पसको विधान अनुसार प्रत्येक ३÷३ वर्षमा वर्षमा क्याम्पस संचालक समिति गठन गर्नुपर्ने व्यवस्था छ । ०७५ सालमा गठन गर्नुपर्ने क्याम्पस संचालक समिति त्यतिबेला विभिन्न कारणले बन्न सकेन । क्याम्पसले पटक–पटक क्याम्पस संचालक समिति बनाउन आग्रह गर्दा समेत जिल्लाका राजनैतिक दलहरुले चासो नदेखाएको क्याम्पस स्रोतले जनाएको छ ।
क्याम्पस संचालक समिति नबन्दा चैत्र ५ गते हुन गइरहेको स्ववियु निर्वाचन पनि पाणिनीमा हुन सकेको छैन् । क्याम्पस संचालक समिति गठन, स्ववियु निर्वाचन, क्याम्पसमा भएका विविध समस्या लगायतका विषयलाई लिएर सनिवार अर्घाखाँचीका संयुक्त विद्यार्थी संगठनहरुले क्याम्पसमा राजनैतिक दल, क्याम्पस प्रशासन र विद्यार्थी बिच अन्तरक्रिया कार्यक्रमको आयोजना गरेका थिए । अन्तरक्रिया कार्यक्रममा नेकपा एमाले र नेपाली कांग्रेसका प्रतिनिधि सहभागी नभएको अखिल (क्रान्तिकारी)का अध्यक्ष सुदिप खनालले बताए । “क्याम्पसमा हामीले अन्तरक्रिया कार्यक्रमको आयोजना गरेका थियौ, अन्य सबै राजनैतिक दलका प्रमुख वा प्रतिनिधिको सहभागीता रह्यो तर पटक पटक सम्पर्क गर्दा समेत प्रमुख राजनैतिक दलहरु नेकपा एमाले र नेपाली कांग्रेसको प्रतिनिधिको उपस्थिति रहेन, यसरी हेर्दा उहाँहरुले क्याम्पसको विषयमा चाँसो देखाएको देखिएन् ।” उनले भने ।
०७५ सालमा संचालक समिति गठन गर्ने विषयमा बैठक बस्दा १५ दिनमा संचालक समिति बनाउने निणर्य भएकोमा अहिले सम्म त्यो १५ दिन नआएको क्याम्पस प्रमुख बुद्धि भुसालले बताए । भुसाले जिल्लाको धरोहर भनेर चिनिने पाणिनी क्याम्पसमा सरोकारवालले हेर्ने दृष्टिकोण सामान्य विद्यालय जति पनि नरहेको बताए । “शैक्षिक हरोहर भनेर चिनिने यस क्याम्पसमा सरोकारवालाको खास्सै ध्यान गएको छैन, यहाँ अध्यापन गराउने शिक्षकहरुलाई समेत बल्ल बल्ल तलब खुवाएका छौं ।” भुसालले भने । यस्तै उनले समिति नबन्दा समेत क्याम्पस संचालन गर्न समस्या परेको सुनाए । पटक पटक सम्पर्क गरी संचालक समिति बनाउन आग्रह गर्दा समेत राजनैतिक दलहरुले चासो नदेखाएको बताए । “संचालक समिति नबन्दा क्याम्पसको प्रशासनिक काम गर्न समेत धेरै गाह्रो भएको छ, भंग भएको संचालक समितिलाई हालसम्म मान्दै काम गरिदै आइएको छ ।” संचालक समिति बनेपछि स्ववियु निर्वाचन गराउने जिम्मा क्याम्पस प्रशासनले लिने प्रमुख भुसालको भनाइ छ ।
अनतरक्रिया कार्यक्रममा बोल्दै नेकपा एकीकृत समाजवादीका अध्यक्ष राम बहादुर चौहानले क्याम्पसमा तत्काल संचालक समिति गठन गर्नुपर्ने बताए । उनले हिजो स्ववियु चाहिन्छ भन्दै नाराबाजी गर्ने हामी नेताहरु आज स्ववियु गराउने ठाउँमा आउदा हिजोको इतिहास विर्सिएर जान नहुने बताउदै स्ववियु तत्काल गर्नुपर्ने बताएका थिए । उनले पाणिनी क्याम्पसलाई जिल्लाको मात्र नभइ देशै नमुना क्याम्पस बनाउनको लागि सबै पक्ष लाग्नुपर्ने बताए ।
यसैबिच संयुक्त विद्यार्थी संगठनका नेताहरुले तत्काल आफ्ना माग पुरा नभए आफ्ना अन्य कार्यक्रमहरु अघि बढाउने राजनैतिक दललाई चेतावनी दिएका थिए । उनिहरुले विद्यार्थी संगठनहरु राजनैतिक दलका चुनावका मतियार नभएका बताउदै तत्काल पाणिनी क्याम्पसमा संचालक समिति गठन गरी स्ववियु निर्वाचन गर्न माग राखेका थिए ।
