अर्घाखाँची । अखिल नेपाल महिला संघ (समाजवादी) जिल्ला समिति अर्घाखाँचीले नेपाली नारीहरुको महान चाड तीजलाई मध्यनजर गर्दै तीज विशेष दर खाने कार्यक्रमको आयोजना गरेको छ । भाद्र २५ गते सोमबार सन्धिखर्कको होटल डायमण्डमा कार्यक्रमको आयोजना गरिएको अनेमसंघका नेता सुनिता बेल्वासेले जानकारी दिइन् । उनका अनुसार कार्यक्रमको तयारी लगभग पूरा भइसकेको छ ।
यस्तै कार्यक्रममा चेलिबेटीले दर खाने, तीजका भाकाहरुमा नृत्य गर्नेछन् । कार्यक्रमलाई भव्यता साथ सम्पन्न गर्ने तयारी रहेको अनेमसंघ समाजवादीका नेता सुमित्रा मुखियाले बताइन् । उनले कार्यक्रममा धेरै महिलाको सहभागीता रहेने जानकारी दिइन् । हिजो सनिवार बसेको नेकपा (एकीकृत समाजवादी) अर्घाखाँचीको सचिवालय बैठकमा समेत तिज विशेष दर खाने कार्यक्रमको छलफल भएको थियो ।
खासगरी तिजको अघिल्लो दिन घरमै बनाएर दर खाने गरिन्छ, तर विभिन्न संघ संस्थाले भने त्यो दिन बिदा हुने भएकाले दर खाने कार्यक्रमको आयोजना गरि पहिला देखि नै दर खाने चलन छ । भाद्र शुक्ल द्वितीया अर्थात हरितालिका तीजको अघिल्लो दिन तीजको निराहार व्रत बस्न शक्ति प्राप्तिका लागि नेपाली हिन्दु नारीहरुले दर खाने परम्परा छ ।
दर खाने दिनमा विभिन्न मीठा परिकार बनाएर खाने र नाचगान गरेर रमाइलो गर्ने चलन छ ।
