- दशैँमा यात्रुको सहजताका लागि सशस्त्र प्रहरीले उपत्यकामा निःशुल्क बस सेवा सञ्चालन गरेको छ।
- यो सेवा आजदेखि टीकाको दिनसम्म बिहान ८ देखि बेलुका ६ बजेसम्म लगातार तीन दिन सञ्चालन हुनेछ।
- प्रहरी प्रधान कार्यालय हल्चोकबाट छुटेका दुईवटा बसले उपत्यकाका विभिन्न मुख्य रुटमा सेवा दिनेछन्।
काठमाण्डौ – दशैँको अवसरमा काठमाण्डौ उपत्यकामा सशस्त्र प्रहरी बल नेपालले निःशुल्क बस सेवा सञ्चालन गरेको छ ।
सशस्त्र प्रहरी बलले काठमाण्डौ उपत्यकाभित्र सर्वसाधारण यात्रुहरूको सहजताका लागि २ वटा बस निःशुल्क रूपमा सञ्चालन गरेको जनाएको छ । दशैँमा काठमाण्डौ उपत्यकामा सार्वजनिक यातायातका साधन न्यून रूपमा चल्ने भएकाले आवतजावतमा सुविधा पुर्याउने उद्देश्यका साथ निःशुल्क २ वटा बस सेवा सञ्चालन गरिएको सशस्त्र प्रहरी नायब महानिरीक्षक एवं प्रवक्ता नेत्रबहादुर कार्कीले जानकारी दिनुभयो ।
निःशुल्क बस सेवा आजदेखि लगातार ३ दिन अर्थात् दशैँको टीकाका दिनसम्म बिहान ८ बजेदेखि बेलुका ६ बजेसम्म सञ्चालन हुने व्यवस्था मिलाइएको छ । सशस्त्र प्रहरी बल, नेपाल प्रधान कार्यालय हल्चोकबाट निस्कने एउटा बसले बालाजु, नयाँ बसपार्क, कोटेश्वर, सातदोबाटो बल्खु हुँदै विभिन्न ठाउँका यात्रुहरूलाई सेवा दिनेछ ।
त्यसैगरी सशस्त्र प्रहरी बल, नेपाल प्रधान कार्यालयबाटै निस्कने अर्को बसले सितापाइला, कलङ्की, बल्खु, कोटेश्वर, नयाँ बसपार्क, हुँदै विभिन्न ठाउँका यात्रुलाई निःशुल्क सेवा प्रदान गर्नेछ ।
