- दशैँ र तिहारमा चिनीको अभाव हुन नदिन खाद्य व्यवस्था तथा व्यापार कम्पनीसँग पर्याप्त मौज्दात रहेको छ।
- कम्पनीले थप चिनी आयातको तयारी गर्दै डिलर र सहकारीमार्फत तोकिएको मूल्यमा वितरण गरिरहेको छ।
- देशभर सहुलियत पसल सञ्चालनमा रहे पनि अहिले चिनीमा दिइँदै आएको विशेष छुट भने बन्द गरिएको छ।
काठमाण्डाै – मुख्य चाड दशैँ र तिहारमा चिनीको अभाव हुन नदिन आवश्यक मौज्दात व्यवस्थापन गरेको खाद्य व्यवस्था तथा व्यापार कम्पनी लिमिटेडले जनाएको छ ।
कम्पनीसँग अहिले झन्डै २२ हजार क्विन्टल चिनी मौज्दात रहेको र आवश्यकताअनुसार थप आयात गर्ने तयारी भइरहेको कम्पनीका सूचना अधिकारी माधव मिश्रले बताउनुभएको छ ।
सरकारले उपलब्ध गराएको २५ हजार क्विन्टल चिनीमध्ये १० हजार क्विन्टल आइसकेको र बाँकी १५ हजार क्विन्टल आवश्यकताअनुसार ल्याउने विषयमा तयारी भइरहेको उहाँले बताउनुभयो ।
कम्पनीले मौज्दात रहेको चिनी खुद्रा बिक्रीका साथै डिलर, सहकारी र साझेदार संस्थामार्फत वितरण गरिरहेको छ । सरकारले उपलब्ध गराएको चिनी काठमाण्डौ उपत्यकामा प्रतिकिलो १०९ रुपैयाँ र उपत्यकाबाहिर ११० रुपैयाँमा बिक्री भइरहेको छ ।
खाद्य कम्पनीले यस वर्ष गएको साउन २८ गतेदेखि नै सहुलियत पसल सञ्चालनमा ल्याएको थियो । अहिले देशका ४४ जिल्लाका १९३ ठाउँबाट सहुलियत पसल सञ्चालन भइरहेका छन् । अरू खाद्यवस्तुमा छुट भए पनि चिनीमा दिइँदै आएको छुट भने अहिले बन्द गरिएको मिश्रले बताउनुभएको छ ।
