अख्तियारमा एक वर्षमा झन्डै ४१ हजार उजुरी

आयोगले आज काठमाण्डाैमा पत्रकार सम्मेलन गरेर दिएको जानकारीअनुसार कुल उजुरीमध्ये स्क्रिनिङ तथा प्रारम्भिक छानबिनबाट ८० प्रतिशतभन्दा धेरै अर्थात् ३२ हजार ८२३ वटा उजुरी फर्छ्याेट भएका छन् ।

तहगतरूपमा विश्लेषण गर्दा पालिकामा हुने अनियमितताविरुद्ध सबैभन्दा धेरै २० हजार २५ वटा उजुरी परेका छन् । यो कुल उजुरीको झन्डै आधा हाने । यस्तै सङ्घीय सरकारतर्फ झन्डै ३८ प्रतिशत र प्रदेश सरकारतर्फ १३ प्रतिशत उजुरी दर्ता भएका छन् ।

सङ्घीय मन्त्रालयहरूतर्फ सबैभन्दा धेरै उजुरी भूमि व्यवस्था, सहकारी तथा सङ्घीय मामिला मन्त्रालयसँग सम्बन्धित परेका छन् । प्रदेशतर्फ मधेश प्रदेशमा सबैभन्दा धेरै र गण्डकी प्रदेशमा सबैभन्दा कम उजुरी दर्ता भएका छन् । यस्तै पालिकातर्फ काठमाण्डाै र पोखरा महानगरपालिकामा सबैभन्दा धेरै उजुरी परेका छन् । उजुरी परेका शीर्ष १० पालिकामध्ये ८ वटा मधेश प्रदेशकै रहेका छन् ।

आयोगका प्रवक्ता सुरेश न्यौपानेका अनुसार समीक्षा अवधिमा विभिन्न भ्रष्टाचारजन्य कसुरमा विशेष अदालतमा १७५ वटा मुद्दा दायर भएका छन् । सार्वजनिक सम्पत्ति हानि–नोक्सानी र घुस–रिसवतसम्बन्धी मुद्दा धेरै रहेका छन् । यी मुद्दाहरूमा ९९० जनालाई प्रतिवादी बनाउँदै कुल २५ अर्ब २३ करोड ६५ लाख रुपैयाँभन्दा धेरै बिगो मागदाबी गरिएको छ ।

यसै अवधिमा विशेष अदालतबाट फैसला भएका १५६ वटा मुद्दामध्ये झन्डै ५२ प्रतिशतमा आयोगलाई सफलता मिलेको छ । उजुरी दर्ताका लागि आयोगले वेबसाइट, इमेल, टेलिफोन, सामाजिक सञ्जाल र ‘हेलो सरकार’ लगायतका माध्यम प्रयोग गर्दै आएको छ ।