सन्धिखर्कमा नेकपा अर्घाखाँचीको राष्ट्रिय जागरण अभियान भव्य रूपमा उद्घाटन

हृदय भुसाल अर्घाखाँची ।नेपाली कम्युनिस्ट पार्टी (नेकपा) को राष्ट्रिय जागरण अभियानअन्तर्गत अर्घाखाँचीको सन्धिखर्कमा उद्घाटन तथा प्रशिक्षण कार्यक्रम भव्य रूपमा सम्पन्न भएको छ । सोमबार  सन्धिखर्क नगरपालिका–१ स्थित सहिद स्मृति प्रतिष्ठानको भवनमा आयोजित कार्यक्रमका प्रमुख अतिथि पार्टीका केन्द्रीय संयोजक समितिका सदस्य, तथा लुम्बिनी प्रदेश इन्चार्ज एवं पूर्वमन्त्री चक्रपाणि खनाल खनालले ब्यानर वाचन गरी अभियानको औपचारिक उद्घाटन गर्नुभएको थियो।

कार्यक्रमलाई सम्बोधन गर्दै प्रमुख अतिथि खनालले वर्तमान राष्ट्रिय तथा अन्तर्राष्ट्रिय राजनीतिक परिस्थिति, समसामयिक राजनीतिक चुनौती र पार्टीको आगामी कार्ययोजनाका विषयमा विस्तृत धारणा राख्नुभएको थियो। उहाँले पार्टीको वैचारिक स्पष्टता, संगठन सुदृढीकरण र जनतासँगको सम्बन्ध विस्तारमा जोड दिँदै उपस्थित नेता तथा कार्यकर्तालाई प्रशिक्षण समेत दिनुभएको थियो।                        कार्यक्रमका विशेष अतिथि पार्टीका केन्द्रीय सदस्य एवं लुम्बिनी प्रदेश संयोजक अब्दुल हुसेनले वामपन्थी आन्दोलनको वर्तमान अवस्था, यसले भोगिरहेका चुनौती तथा आगामी राजनीतिक दिशाका विषयमा प्रशिक्षणमूलक मन्तव्य राख्नुभएको थियो।

केन्द्रीय सदस्य तथा जिल्ला संयोजक रामबहादुर चौहानको अध्यक्षतामा सम्पन्न कार्यक्रमको सञ्चालन केन्द्रीय सदस्य ठाकुर सौराग आदर्शले गर्नुभएको थियो। जिल्ला सह–इन्चार्ज छमकुमारी खनालले स्वागत मन्तव्य राख्नुभएको थियो।

कार्यक्रममा केन्द्रीय सदस्य तथा पूर्व राष्ट्रिय सभा सदस्य चन्द्रबहादुर खड्का, पूर्व राज्यमन्त्री सुशीला सिर्पाली, जिल्ला इन्चार्ज ठाकुरकुमार विक, जिल्ला सह–इन्चार्ज राजेन्द्र भुसाल, केन्द्रीय सदस्यहरू सुनिता बेल्वासे, धर्मराज भुसाल, युवराज पौडेल, नारायण विक लगायत आथित्यता रहेको कार्यक्रममा  प्रदेश तथा जिल्ला तहका नेता–कार्यकर्ताहरूको उल्लेख्य उपस्थिति रहेको थियो।

राष्ट्रिय जागरण अभियानमार्फत पार्टीको संगठनात्मक गतिविधिलाई थप सक्रिय बनाउने, नेता तथा कार्यकर्तालाई वैचारिक रूपमा प्रशिक्षित गर्ने र जनतासँगको सम्बन्धलाई थप सुदृढ बनाउने उद्देश्य राखिएको आयोजकले जनाएको छ।