काठमाडौं, २६ असोज । कोशी प्रदेशका मुख्यमन्त्री आज टुंगो लाग्दैछ ।
कोशी प्रदेशका भावी मुख्यमन्त्रीका लागि सत्ता गठबन्धनबाट माओवादी संसदीय दलका नेता इन्द्रबहादुर आङ्बो र नेकपा (एमाले)को समर्थनमा नेपाली कांग्रेसका शेखर कोइराला समूहका केदार कार्की दुवैले गरेको दावीमा आज टुंगो लाग्ने भएको हो ।
प्रदेश प्रमुख परशुराम खापुङले आज साँझ ५ बजेसम्म भावी मुख्यमन्त्रीको टुंगो लगाउने छन् ।
माओवादी नेता आङ्बोले गठबन्धनमा रहेका दलहरु नेपाली कांग्रेस, माओवादी, नेकपा एसका र जसपाका सांसदको हस्ताक्षर बुझाएका छन् भने कांग्रेसका कार्कीले आफूसहित कांग्रेसका ८ र एमालेका ३९ सदस्यको हस्ताक्षरसहित कुल ४७ जनाको समर्थनसहित मुख्यमन्त्रीको दाबी गरेका छन् ।
संविधानको धारा १६८ को उपधारा ५ बमोजिम सरकार गठनका लागि हस्ताक्षर गर्दा सांसदलाई ह्वीप नलाग्ने र स्वतन्त्र हैसियत रहने सर्वोच्चअदालतको व्याख्या छ ।
कुल ९३ सदस्यीय कोशी प्रदेश सभामा बहुमतका लागि ४७ सदस्य आवश्यक हुन्छ । कोशीमा नेकपा (एमाले)का ४० (उपसभामुखसहित), नेपाली कांग्रेसका २९, माओवादी केन्द्रका १३, नेकपा (एकीकृत समाजवादी)का ४ र जनता समाजवादी पार्टी (जसपा)का एक सदस्य छन् ।
