काठमाण्डाै – सांसद दीपक बोहोराको निधनमा शोक प्रस्ताव पारित गरेर संसद् बैठक अन्त्य भएको छ । प्रतिनिधिसभाको आजको बैठकमा सभामुख देवराज घिमिरेले शोक प्रस्ताव राख्नुभएको थियो । शोक प्रस्ताव सर्वसम्मतिबाट पारित भयो ।
रुपन्देहीको क्षेत्र नम्बर–३ बाट निर्वाचित राप्रपाका सांसद बोहोराको ७६ वर्षको उमेरमा आज बिहान निधन भएको हो । आजको बैठकमा सभामुख घिमिरले संसद्को हिउँदे अधिवेशन अन्त्यसम्बन्धी राष्ट्रपति कार्यालयबाट प्राप्त पत्रको ब्यहोराबारे पनि जानकारी दिनुभएको थियो ।
हिजो बसेको मन्त्रिपरिषद् बैठकले सङ्घीय संसद्को चालू अधिवेशन आज राति १२ बजेदेखि अन्त्य गर्न राष्ट्रपति रामचन्द्र पौडेलसमक्ष सिफारिश गरेको थियो । त्यसअनुसार राष्ट्रपति पौडेलले सङ्घीय संसद्का दुवै सदनका चालू अधिवेशन आज राति १२ बजेदेखि लागू हुने गरी अन्त्य गर्नुभएको छ ।
संसद्को हिउँदे अधिवेशन गएको माघ १८ गतेदेखि शुरू भएको थियो ।
