काठमाण्डाै – नेपाल प्रहरीमा ३० वर्षे सेवा अवधि कार्यान्वयन नगर्न यसअघि दिएकाे अन्तरिम आदेश सर्वाेच्च अदालतले खारेज गरेकाे छ ।
न्यायाधीशहरू विनोद शर्मा र शारंगा सुवेदीको इजलासले ३० वर्षे सेवा अवधिबाट अवकाशमा नपठाउन दिएको अन्तरिम आदेश आज खारेज गरेकाे हाे । याेसँगै नेपाल प्रहरीमा ३० वर्षे सेवा अवधि नै कायम हुने भएकाे छ ।
यसअघि नेपाल प्रहरीका वरिष्ठ प्रहरी उपरीक्षक (एसएसपी) सहितका २१ जनाले आफूहरूलाई ३० वर्ष सेवा अवधिमा अवकाश दिन लागेको भन्दै भदाै ५ गते सर्वोच्चमा रिट दायर गरेका थिए । याे रिटमा पहिलो सुनुवाइ गर्दै न्यायाधीश हरिप्रसाद फुयाँलको एकल इजलासले अन्तरिम आदेश जारी गरेको थियो ।
सर्वोच्चकाे अन्तरिम आदेशपछि सरकारले यो आदेश कार्यान्वयन गर्न नसकिने भन्दै गृह मन्त्रालयमार्फत भ्याकेटको निवेदन दर्ता गरेको थियो ।
