काठमाण्डौ – आज बाग्मती, कोशी, मधेश, गण्डकी र लुम्बिनी प्रदेशको पहाडी भू–भागमा मौसम आंशिकदेखि सामान्य बदली हुनेछ । केही ठाउँमा मेघगर्जनसहित हल्का वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।
बागमती, कोशी, मधेश प्रदेशका केही ठाउँमा अहिले पनि हल्का पानी परिरहेको छ । बागमती, कोशी र मधेश प्रदेशका धेरै ठाउँमा गएराति पनि पानी परेको थियो । मधेशको सिरहा र सुनसरी जिल्लामा ५० मिलिमिटरभन्दा धेरै वर्षा मापन भएको महाशाखाका मौसमविद् सञ्जिव अधिकारीले जानकारी दिनुभयो । काठमाण्डौ उपत्यकामा भने गएको २४ घण्टामा १ दशमलव ५ मिलिमिटर वर्षा भएको छ ।
हिजोकोभन्दा आज मौसम सुधार हुने अनुमान रहेको मौसमविद् सञ्जिव अधिकारीले बताउनुभयो ।
यसैबीच कोशी र बागमती प्रदेशका उच्च भू–भागका केही ठाउँमा आज हल्का हिमपातको सम्भावना छ । आज राति देशभर आंशिक बदली हुने महाशाखाको अनुमान छ ।
