तुइन तर्ने क्रममा कर्णाली नदीमा खसेर एक जना बेपत्ता भएका छन् । सर्केगाड गाउँपालिका-३ स्थित लेप्चेघाटमा मुगुको सोरू गाउँपालिका-५ का ३८ वर्षीय मकरसिंह नेपाली तुइनबाट खसेर बेपत्ता भएको प्रहरीले जनाएको छ ।
हिजो साँझ ६ बजेरतिर तुइनबाट खसेर नेपाली बेपत्ता भएको जिल्ला प्रहरी कार्यालय हुम्लाले जनाएको छ। कर्णाली करिडोर अन्तर्गत छारे-सुनाखाडामा काम गर्नको लागि उनी मुगुबाट हुम्ला पुगेको जिल्ला प्रहरी कार्यालय हुम्लाका प्रहरी नायब उपरीक्षक भिमलाल भट्टराईले बताए।
बेपत्ता भएका नेपालीलाई हिजो राति खोजीकार्य सम्भव नभएपछि आज बिहानै देखि प्रहरी खोजीमा जुटेको छ । कर्णाली करिडोर अन्तर्गत छारे-सुनाखाडा खण्डको सामान तार्न कर्णाली नदीमा तुइन निर्माण गरिएको छ ।
