- अर्घाखाँचीको भूमिकास्थान–१० मा आजबाट एक लाख राशिको क्रिकेट प्रतियोगिता सुरु हुँदैछ।
- नगर प्रमुख झविलाल थापाले दिउँसो १२ बजे विशेष समारोहका बीच खेलको उद्घाटन गर्नेछन्।
- स्थानीय प्रतिभाको पहिचान र खेलकुद विकासका लागि आयोजना गरिएको प्रतियोगितामा विजेताले एक लाख र उपविजेताले ५० हजार पाउनेछन्।
हृदय भुसाल ।अर्घाखाँचीको भूमिकास्थान नगरपालिका–१० धन्चौरस्थित आरिचौर खेलमैदानमा एक लाख रुपैयाँ राशिको खुला क्रिकेट प्रतियोगिता आज विशेष कार्यक्रमका बीच उद्घाटन हुँदैछ। कार्तिक ११ गतेदेखि सञ्चालन हुने प्रतियोगिताको उद्घाटन कार्यक्रम आज दिउँसो १२ बजे तय गरिएको आयोजकले जनाएको छ।
प्रतियोगिताको उद्घाटन भूमिकास्थान नगरपालिकाका नगर प्रमुख झविलाल थापाले गर्ने कार्यक्रम तय भएको छ। उद्घाटन समारोहमा भूमिकास्थान नगरपालिका–१० का वडा अध्यक्ष खगेश्वर पन्थी तथा सामाजिक एवं राजनीतिक युवा व्यक्तित्व लिलबहादुर जिसीको विशेष आतिथ्यता रहने आयोजकले जानकारी दिएको छ।
धन्चौर क्षेत्रमा क्रिकेट खेलको विकास, स्थानीय खेलाडीको प्रतिभा पहिचान तथा युवालाई खेलकुदमा आकर्षित गर्ने उद्देश्यले प्रतियोगिता आयोजना गरिएको हो। प्रतियोगिताले स्थानीय खेलाडीलाई आफ्नो प्रतिभा प्रदर्शन गर्ने अवसर प्रदान गर्नुका साथै खेलकुदको माध्यमबाट युवाबीच आपसी सद्भाव, सहकार्य र प्रतिस्पर्धात्मक भावनाको विकास गर्ने अपेक्षा गरिएको छ।प्रतियोगितामा विजेता टिमले नगद एक लाख रुपैयाँसहित मेडल तथा प्रमाणपत्र प्राप्त गर्नेछ भने उपविजेता टिमले नगद ५० हजार रुपैयाँसहित मेडल तथा प्रमाणपत्र प्राप्त गर्नेछ। धन्चौर क्षेत्रमा यस स्तरको पुरस्कार राशिसहित खुला क्रिकेट प्रतियोगिता आयोजना हुन लागेपछि स्थानीय खेलप्रेमी तथा युवामा उत्साह थपिएको छ।
प्रतियोगितालाई व्यवस्थित र सफल बनाउन आयोजकले आवश्यक तयारी पूरा गरेको जनाएको छ। खेलकुदप्रेमी, स्थानीय जनप्रतिनिधि, सामाजिक तथा राजनीतिक व्यक्तित्व, विभिन्न संघसंस्थाका प्रतिनिधि र सर्वसाधारणलाई उद्घाटन समारोहमा उपस्थितिका लागि आयोजकले आग्रह गरेको छ।
प्रतियोगिताले धन्चौरको खेलकुद विकासमा योगदान पुर्याउनुका साथै स्थानीय क्षेत्रको पहिचान स्थापित गर्न र आगामी दिनमा खेलकुद गतिविधिलाई थप प्रोत्साहन गर्न सहयोग पुग्ने अपेक्षा गरिएको छ।
