- अर्घाखाँचीको भूमिकास्थान–१० धन्चौरस्थित देउरालीमा त्रयोदशीको अवसरमा भव्य सराय नाच हुने भएको छ।
- महिला र पुरुषको सक्रिय सहभागिता रहने यस नाचले सामाजिक एकता, भाइचारा र मौलिक संस्कृतिको संरक्षण गर्नेछ।
- मन्दिर व्यवस्थापन समिति र वडा कार्यालयले सम्पूर्ण दर्शक तथा श्रद्धालुलाई उपस्थित हुन आग्रह गरेका छन्।
हृदय भुसाल अर्घाखाँची। अर्घाखाँचीको भूमिकास्थान नगरपालिका–१०, धन्चौरस्थित देउरालीमा त्रयोदशीको अवसरमा भव्य सराय नाच हुने भएको छ। विगतदेखि नै परम्परागत रूपमा मनाउँदै आइएको सराय नाचलाई यस वर्ष पनि व्यवस्थित, आकर्षक र भव्य रूपमा सम्पन्न गर्ने तयारी गरिएको मन्दिर व्यवस्थापन समितिले जनाएको छ।
मन्दिर व्यवस्थापन समितिका अध्यक्ष रेमलाल भट्टराईका अनुसार देउरालीमा आयोजना हुने सराय नाच यस क्षेत्रको मौलिक संस्कृति, धार्मिक आस्था र परम्परासँग जोडिएको महत्त्वपूर्ण सांस्कृतिक पर्व हो। पुस्तौँदेखि निरन्तरता पाउँदै आएको यस नाचले स्थानीय समुदायबीच आपसी सद्भाव, एकता र भाइचाराको भावना बलियो बनाउँदै आएको छ। यस वर्ष पनि सराय नाचलाई व्यवस्थित रूपमा सञ्चालन गर्न आवश्यक तयारी भइरहेको उहाँले बताउनुभयो।
भूमिकास्थान नगरपालिका–१० का वडा अध्यक्ष खगेश्वर पन्थीले विगतका वर्षहरूमा जस्तै यस वर्ष पनि देउरालीको सराय नाच भव्य रूपमा सम्पन्न हुने विश्वास व्यक्त गर्दै सम्पूर्ण दर्शक, श्रद्धालु तथा स्थानीयवासीलाई उपस्थितिका लागि आग्रह गर्नुभएको छ। उहाँले यस्ता मौलिक सांस्कृतिक परम्पराले स्थानीय पहिचानलाई जीवन्त राख्नुका साथै नयाँ पुस्तालाई आफ्नो संस्कृति र इतिहासबारे परिचित गराउन महत्त्वपूर्ण भूमिका खेल्ने बताउनुभयो।
यस क्षेत्रको सराय नाचको अर्को विशेषता महिला तथा पुरुष दुवैको सक्रिय सहभागिता रहनु हो। महिला र पुरुष एकसाथ सराय खेल्ने परम्पराले यहाँको सांस्कृतिक मौलिकतालाई थप विशिष्ट बनाएको मन्दिर व्यवस्थापन समितिका सचिव भुवन क्षेत्रीले बताउनुभयो। उहाँका अनुसार देउरालीको सराय नाच मनोरञ्जनको माध्यम मात्र नभई यस क्षेत्रको ऐतिहासिक विरासत, धार्मिक विश्वास र सामाजिक एकताको प्रतीक समेत हो।
सराय नाच नेपाली मौलिक लोकसंस्कृति र परम्पराको महत्त्वपूर्ण हिस्सा हो। यस्ता सांस्कृतिक गतिविधिले स्थानीय कला, परम्परा र पहिचानको संरक्षण गर्न सहयोग पुर्याउनुका साथै गाउँघरमा उत्साह र उल्लासको वातावरण सिर्जना गर्छन्। विशेषगरी चाडपर्वका अवसरमा आयोजना हुने सराय नाचले टाढाटाढा रहेका आफन्त, इष्टमित्र तथा स्थानीयवासीलाई एकै ठाउँमा भेला हुने अवसरसमेत प्रदान गर्छ।
त्रयोदशीको अवसरमा देउरालीमा आयोजना हुने भव्य सराय नाचले यस क्षेत्रको धार्मिक तथा सांस्कृतिक महत्त्वलाई थप उजागर गर्ने अपेक्षा गरिएको मन्दीर ब्यबस्थापन समितिका कोसाध्यक्ष सुधीर नेपालीले बताउनु भयो । मान्दिर समितिले सम्पूर्ण स्थानीयवासी, सरायप्रेमी तथा दर्शकलाई कार्यक्रममा सहभागी भई मौलिक संस्कृतिको संरक्षण र प्रवर्द्धनमा साथ दिन आग्रह गरेका छन्।
