- नेपाल वैदेशिक रोजगार व्यवसायी सङ्घले आफ्ना सबै आन्दोलनका कार्यक्रम फिर्ता लिएको छ।
- श्रम मन्त्रालयले ४५ दिनभित्र माग सम्बोधन गर्ने सहमति गरेपछि व्यवसायी काममा फर्केका हुन्।
- सरकार र व्यवसायीबीचको सहमतिले विदेश जाने श्रमिकमाथि परेको अन्योल तत्कालका लागि हटेको छ।
काठमाण्डाै – नेपाल वैदेशिक रोजगार व्यवसायी सङ्घले आन्दोलनका कार्यक्रम फिर्ता लिएको छ । सेवा शुल्क तोकिनुपर्ने, वैदेशिक रोजगार विभागले गरेको कारबाही फिर्ता लिनुपर्नेलगायतका १५ बुँदे माग अघि सारेको सङ्घले ती मागको सुनुवाइ नभएको भन्दै कार्यालय बन्द गरेर भदौ ७ गतेदेखि श्रमिक पठाउन समेत बन्द गर्ने घोषणा गरेका थियो ।
आज भएको छलफलमा युवा, श्रम तथा रोजगार मन्त्रालयले आफूहरूका माग ४५ दिनभित्र सम्बोधन गर्ने सहमति गरेकाले आन्दोलनका कार्यक्रम स्थगित गरेको नेपाल वैदेशिक रोजगार व्यवसायी सङ्घका महासचिव हरि डाँगीले जानकारी दिनुभयो ।
यस्तै मन्त्रालयले पनि विज्ञप्ति निकालेर श्रममन्त्री, मन्त्रालयका सचिव तथा नेपाल वैदेशिक रोजगार व्यवसायी सङ्घका पदाधिकारीबीच भएको छलफलमा सङ्घले अघि सारेका १५ बुँदे मागबारे विस्तृत छलफल भएको र सरकारको सहमतिपछि व्यवसायीहरूले आन्दोलन फिर्ता लिने सहमति भएको जनाएको छ ।
छलफलका क्रममा सङ्घले उठाएका सबैजसो विषय वैदेशिक रोजगार ऐन तथा नियमावली संशोधनसँग सम्बन्धित नीतिगत विषय रहेको मन्त्रालयले जनाएको छ ।
मन्त्रालयले वैदेशिक रोजगार क्षेत्रलाई थप पारदर्शी, सुरक्षित र मर्यादित बनाउने उद्देश्यसहित ऐन तथा नियमावली संशोधनको प्रक्रिया यथाशीघ्र टुङ्ग्याउन अधिकतम प्रयास गर्ने प्रतिबद्धता जनाएको छ ।
त्यस्तै व्यवसायीहरूले कानूनबमोजिम थप प्रमाण र कागजातसहित आफ्ना समस्या वैदेशिक रोजगार विभागमा पेश गरेमा विभागबाट आवश्यक प्रशासनिक सहजीकरण गरिने र त्यहाँबाट समाधान नभए मन्त्रालयमा पुनरावेदन दिन सकिने व्यवस्था रहेको विषयमा पनि छलफल भएको मन्त्रालयले जनाएको छ ।
यससँगै वैदेशिक रोजगारमा जाने तयारीमा रहेका श्रमिक प्रभावित हुने सम्भावना तत्कालका लागि टरेको छ ।
