- गए राति देशभर वर्षा भएको र हाल मनसुनको प्रभाव पश्चिम नेपालमा केन्द्रित देखिएको छ।
- आज र भोलि देशका विभिन्न स्थानमा ठूलो वर्षा हुने सम्भावना मौसम पूर्वानुमान महाशाखाले जनाएको छ।
- बाढी र पहिरोको जोखिम बढेकाले नदी तटीय क्षेत्र तथा संवेदनशील स्थानमा सतर्कता अपनाउन आग्रह गरिएको छ।
काठमाण्डौ – गए राति देशका सबैजसो ठाउँमा पानी परेको छ । कतै ठूलो वर्षा पनि भएको छ । पछिल्लो १२ घण्टामा सबैभन्दा धेरै स्याङ्जामा १४४ मिलिमिटर वर्षा मापन भएको छ ।
अहिले भने वर्षा पश्चिम नेपालतर्फ केन्द्रित भएको छ । दैलेखमा पछिल्लो १ घण्टामा ४६ मिलिमिटर पानी परेको छ । काठमाण्डौ उपत्यकामा गए राति लगातार वर्षा भए पनि अहिले भने पानी परेको छैन । यस्तै पूर्वी नेपालमा पनि पानी परेको छैन ।
देशभर मनसुनी प्रणाली सक्रिय रहेकाले आज र भोलि विभिन्न प्रदेशमा हल्का,मध्यम र ठूलो पानी पर्ने जल तथा मौसम पूर्वानुमान महाशाखाले जनाएको छ । आज दिउँसो गण्डकी, लुम्बिनी र सुदूरपश्चिम प्रदेशका पहाडी तथा तराईका एक/दुई ठाउँमा ठूलो वर्षा हुन सक्ने महाशाखाले जनाएको छ ।
आज राति पनि सुदूरपश्चिम प्रदेशका पहाडी र तराईका एक–दुई ठाउँमा ठूलो वर्षा हुने सम्भावना रहेकाले त्यस क्षेत्रका नदी–नाला आसपास र पहिरोको जोखिम भएका स्थानमा सतर्कता अपनाउन आग्रह गरिएको छ । यस्तै, भोलि कोशी, गण्डकी र सुदूरपश्चिम प्रदेशका पहाडी तथा तराईका एक–दुई ठाउँमा ठूलो वर्षा हुने सम्भावना रहेको छ ।
ठूलो वर्षा हुन सक्ने क्षेत्रमा आकस्मिक बाढी, पहिरो तथा डुबानको जोखिम बढ्न सक्ने भएकाले आवश्यक सतर्कता अपनाउन महाशाखाको आग्रह छ ।
