- श्रीलङ्कामा तीव्र गतिमा फैलिएको डेङ्गी नियन्त्रण गर्न सरकारले सेना परिचालन गरेको छ।
- हालसम्म झन्डै ५० हजार जना सङ्क्रमित भएका छन् भने २९ जनाको मृत्यु भइसकेको छ।
- लामखुट्टेका प्रजनन स्थल नष्ट गर्न भोलिदेखि देशव्यापी सरसफाइ अभियान सञ्चालन गरिँदै छ।
राष्ट्रपति अनुरा कुमार दिसानायकेको कार्यालयका अनुसार लामखुट्टेबाट फैलिने डेङ्गी नियन्त्रणका लागि सेना, नौसेना र वायुसेनाका सदस्यहरू संयुक्त विशेष एकाइमा परिचालित भएका छन् । उनीहरूले लामखुट्टे प्रजनन हुने ठाउँ पहिचान गरी नष्ट गर्ने अभियान सञ्चालन गर्ने खबरमा उल्लेख छ ।
यस वर्ष श्रीलङ्कामा अहिलेसम्म झन्डै ५० हजार जनामा डेङ्गी सङ्क्रमण पुष्टि भइसकेको छ भने २९ जनाको ज्यान गएको छ । यद्यपि यो सङ्ख्या सन् २०१७ को महामारीभन्दा कम हो । त्यति बेला १ लाख ८६ हजार जना सङ्क्रमित भएका थिए भने ४४० जनाको ज्यान गएको थियो ।
सरकारले भोलिदेखि देशव्यापी सरसफाइ तथा लामखुट्टे प्रजनन स्थल नष्ट गर्ने अभियान शुरू गर्ने जनाएको छ ।
विश्व स्वास्थ्य सङ्गठन (डब्ल्यूएचओ) ले जलवायु परिवर्तनका कारण डेङ्गीजस्ता लामखुट्टेजन्य रोग तीव्र रूपमा फैलिँदै गएको चेतावनी दिँदै आएको छ ।
स्वास्थ्य विभागका अनुसार राज्य तथा निजी अस्पतालहरू पहिले नै अत्यधिक दबावमा छन् र थप सङ्क्रमणले स्वास्थ्य प्रणालीमा ठूलो चुनौती सिर्जना गर्ने जोखिम बढेको छ ।
मनसुनी वर्षा, भर्खरैको बाढी र पानी जम्ने ठाउँहरूको वृद्धिका कारण सङ्क्रमण फैलिन सहज वातावरण बनेको अधिकारीहरूको मूल्याङ्कन छ ।स्रोत उज्यालो
