- संविधान संशोधनका लागि राष्ट्रिय सहमति जुटाउने कार्यदलका संयोजक असिम शाहले बताउनुभएको छ।
- सरकारले सबै सरोकारवालासँग बृहत् छलफल गरेर मात्र संशोधनको प्रक्रिया अघि बढाउनेछ।
- संयोजक शाहले १५ देखि २० दिनभित्र प्रतिवेदन तयार गरी प्रधानमन्त्रीलाई बुझाउने जानकारी दिनुभएको छ।
काठमाण्डौ – संविधान संशोधनका लागि बहसपत्र तयार गर्न गठित कार्यदलका संयोजक असिम शाहले राष्ट्रिय सहमतिमा नै संविधान संशोधन हुने बताउनुभएको छ ।
सरकारले एकलौटी ढङ्गले संविधान संशोधन गर्न लागेको भन्ने धारणा गलत भएको र कुनै आशङ्का नगर्न उहाँको आग्रह छ । हिजो प्रधानमन्त्री तथा मन्त्रिपरिषद्को कार्यालयमा संविधानविद् तथा कानुनविद्सँगको परामर्श बैठकमा संयोजक शाहले पछिल्लो समय आइरहेका भ्रमलाई चिर्दै सबै राजनीतिक दल तथा सरोकारवालासँगको बृहत् परामर्शबाट नै संविधान संशोधन हुने बताउनुभयो ।
उहाँले सरकारको १०० दिने कार्य योजनाअनुरूप नै संविधान संशोधनका लागि बहसपत्र तयार गर्न कार्यदल गठन गरिएको जानकारी दिनुभयो । राष्ट्रिय स्वतन्त्र पार्टी (रास्वपा) ले वाचापत्रमै संविधान संशोधनको मुद्दालाई प्राथमिकता दिएको र अबको १५–२० दिनभित्र सरोकारवालासँग बृहत् छलफल गरी तयार पारिने प्रतिवेदन प्रधानमन्त्रीलाई बुझाइने संयोजक शाहले बताउनुभयो ।
छलफलका क्रममा कार्यदलका सदस्य सचिव लिलाधर सुवेदीले संशोधनका लागि पहिचान गरिएका मुख्य विषयवस्तु प्रस्तुत गर्नुभएको थियो । संविधानविद् पूर्णमान शाक्यले संविधानको आधारभूत संरचना प्रतिकूल नहुने गरी मात्र संशोधन गरिनुपर्नेमा जोड दिनुभएको छ ।
