- वैदेशिक रोजगारीमा जाने श्रमिकका लागि न्यूनतम पारिश्रमिक तोक्न सांसदहरूले माग गरेका छन्।
- आउटसोर्सिङमार्फत आउने अदक्ष जनशक्ति व्यवस्थापनमा सरकारले ध्यान दिनुपर्ने औँल्याइएको छ।
- आउटसोर्सिङ क्षेत्रको प्रभावकारी अनुगमन र नियमन गर्न सरकारलाई विशेष ध्यानाकर्षण गराइएको छ।
काठमाण्डाै – प्रतिनिधिसभाका सांसदहरूले वैदेशिक रोजगारीमा जाने नेपाली श्रमिकका लागि न्यूनतम पारिश्रमिक निर्धारण गर्न तथा नियमितबाहेकका कामदार अर्थात् ‘आउटसोर्सिङ’ क्षेत्रमा प्रभावकारी अनुगमन गर्न सरकारको ध्यानाकर्षण गराएका छन् ।
सिंहदरबारमा आज बसेको प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा सांसदहरूले वैदेशिक रोजगारीमा रहेका नेपाली श्रमिकको समस्या, घरेलु कामदारको अवस्था तथा स्वदेशमा बढ्दो आउटसोर्सिङ को व्यवस्थापनबारे सरकारको ध्यानाकर्षण गराएका हुन् ।
बैठकमा नेकपा (एमाले) का सांसद क्षितिज थेबेले कुवेतमा नेपाली श्रमिक पठाउँदा न्यूनतम १५० केडी अर्थात् ७४ हजार रुपैयाँभन्दा कम पारिश्रमिक नहुने गरी सरकारी तहबाटै निर्णय गर्नुपर्ने बताउनुभयो ।
यस्तै राष्ट्रिय स्वतन्त्र पार्टी (रास्वपा) की सांसद रञ्जु न्यौपानेले अनौपचारिक क्षेत्रमा हुने आउटसोर्सिङको अनुगमन अन्य क्षेत्रको भन्दा फरक ढङ्गले गर्नुपर्ने बताउनुभयो ।
रास्वपाकै सिर्जना श्रेष्ठले आउटसोर्सिङमार्फत निजी क्षेत्रमा आउने अदक्ष जनशक्तिका कारण समस्या सिर्जना भइरहेको उल्लेख गर्नुभयाे ।
बैठकमा सहभागी धेरैजसाे सांसदहरूले आउटसोर्सिङ कम्पनी वा दलालमार्फत राखिने कामदारको व्यवस्थित नियमन तथा अनुगमनमा सरकार गम्भीर बन्नुपर्ने धारणा राखेका छन् ।
