काठमाण्डाै – प्रस्तावित विद्यालय शिक्षा विधेयक सच्याउन माग गर्दै नेपाल शिक्षक महासङ्घले नेपाली कांग्रेसको पार्टी कार्यालय सानेपामा धर्ना दिएको छ । महासङ्घ र सरकारबीच विगतमा भएका सहमति अनुसार शिक्षा विधेयक सच्याउन माग गर्दै महासङ्घले पहिलो चरणको आन्दोलन अन्तर्गत कांग्रेस पार्टी कार्यालयमा धर्नामा बसेको हो ।
संसदीय समितिबाट पारित भएर प्रतिनिधिसभामा पुगेको शिक्षा विधेयकमा महासङ्घका मागहरू सम्बोधन गर्न दबाव दिनका लागि आफूहरूले आन्दोलन गरेको महासङ्घका अध्यक्ष लक्ष्मीकिशोर सुवेदीले बताउनुभयो ।
उहाँका अनुसार महासङ्घले भदौ २० गतेसम्म धर्ना कार्यक्रम जारी राख्ने छ । २० गतेसम्म पनि आफ्ना मागहरू पूरा नभए भदौ २१ गते नयाँ आन्दोलनका कार्यक्रमहरू घोषणा गर्ने अध्यक्ष सुवेदीले बताउनुभयो ।
महासङ्घले अस्थायी प्रकृतिका शिक्षकको पदपूर्ति आन्तरिक प्रतिस्पर्धा ७५ प्रतिशत र खुला २५ प्रतिशत हुनुपर्ने माग गरेको छ । विधेयकमा ६० प्रतिशत आन्तरिक र ४० प्रतिशत खुला हुने व्यवस्था छ । विद्यालय कर्मचारीको पद र वेतन तथा बालकक्षा शिक्षकको पद र सेवा सुविधा निश्चित नभएको र अव्यावहारिक सरुवा प्रणालीको व्यवस्था ल्याइएको भन्दै महासङ्घ आन्दोलित भएको हो ।
प्रतिनिधिसभाको शिक्षा, स्वास्थ्य तथा प्रविधि समितिबाट विद्यालय शिक्षा विधेयक भदौ ५ गते पारित भएको थियो ।
