काठमाण्डौ – अण्डाको उत्पादन घटेसँगै मूल्य बढेको छ । गर्मीमा अण्डाको उत्पादन कम हुने, माग उच्च हुने भएकाले मूल्य बढेको व्यवसायीले बताएका छन् ।
चितवनमा रहेको कृषि तथा वन विज्ञान विश्वविद्यालय रामपुरका उपप्राध्यापक डा. अनन्त दाहालका अनुसार गर्मीका कारण कुखुराले दाना कम खाँदा अण्डा उत्पादन कम भएको छ ।
नेपाल लेयर्स कुखुरापालक सङ्घका केन्द्रीय अध्यक्ष विनोद पोखरेलका अनुसार उत्पादन घटेपछि माग धान्न कठिन भएको छ ।
सङ्घले आजदेखि लागू हुनेगरी समर्थन मूल्य तोकेको छ । बढेको समर्थन मूल्यअनुसार चितवनको फार्म मूल्य ठूलो अण्डा प्रतिक्रेट चार सय ८० र मझौला चार सय ५० रुपैयाँ कायम भएको छ । दुवैमा प्रतिक्रेट ३० रुपैयाँले बढेको हो ।
चार महिनाअघि दैनिक ४० हजार कार्टुन अण्डा उत्पादन हुने गरेकोमा अहिले २८ देखि ३० हजारमा झरेको पाेखरेलले बताउनुभयो ।
