भूमिकास्थान नगरपालिकाको सातौँ नगर स्तरिय राष्ट्रपति रनिङ शिल्ड प्रतियोगिता सुरु

गोपाल प्रसाद भट्टराई अर्घाखाँची ।भूमिकास्थान नगरपालिकाको सातौँ नगर स्तरिय राष्ट्रपति रनिङ शिल्ड
प्रतियोगिता सुरु भएको छ । भूमिकास्थानको नुवाकोट मा.वि.चिदिचौरकोखेलमैदानमा बुधबारदेखि प्रतियोगिता सुरु भएको हो ।
प्रतियोगिताको उद्घाटन भूमिकास्थान नगरपालिकाका नगरप्रमुख झविलाल थापाले
गर्नुभयो । नगरप्रमुख थापाले खेलकुदले नगर र जिल्लालाई समेत देशमा पहिचान
दिने बताउनुभयो । शारीरिक र मानसिक स्वास्थ्यका लागि खेलकुद अपरिहार्य
भएको नगरप्रमुख थापाको भनाई छ ।
प्रादेशिक तथा राष्ट्रिय स्तरको प्रतियोगितामा समेत भूमिकास्थानका
खेलाडीले उत्कृष्ट प्रदर्शन गर्नेगरि प्रतियोगितामा सहभागि हुन खेलाडीलाई
उहाँले आग्रह गर्नुभयो । खेलविकासमा नगरले निरन्तर लगानी र गतिविधि गर्दै
आएको स्मरण गर्दै नगरप्रमुख थापाले आगामी दिनमा पनि निरन्तर लागि पर्ने
घोषणा समेत गर्नुभयो ।
कार्यक्रममा उपप्रमुख बालकृष्ण बन्जाडे, प्रमुख प्रशासकिय अधिकृत
जग्दीशचन्द्र नेपाली र शिक्षा शाखा प्रमुख तुवलाल सापकोटाले खेलकुदको
माध्यमबाट शारिरिक स्फूर्ति बढाउनुका साथै चौतर्फी रुपमा क्षमता विकासमा
सहयोगी सिद्ध रहने उल्लेख गर्नुभयो ।
प्रतियोगितामा भलिबल, कबड्डी, दौड, रिलेदौड, हाइजम्प, लङजम्प,
त्रिपलजम्प, सटपूट, ज्यावलिङ थ्रो लगायतका खेल समावेश गरिएको छ ।
प्रतियोगितामा विजेता विद्यार्थि र स्कुललाई शिल्ड, मेडल र प्रमाणपत्रले
सम्मान गरिनेछ ।
प्रतियोगितामा नगरपालिकाभित्रका १३ वटा मा.वि.तहका विद्यालयका
विद्यार्थीले प्रतिस्पर्धा गर्ने भूमिकास्थान नगरपालिकाका कम्प्युटर
अधिकृत शेषकान्त घिमिरे ओशनले जानकारी दिनुभएको छ ।
जेठ १४ गतेबाट सुरु भएको प्रतियोगिता जेठ १७ गतेसम्म सञ्चालन हुने शिक्षा
शाखाका सहायक शिक्षा अधिकृत नविन खड्काले  बताउनुभएको छ । “स्वास्थ्यको
लागि खेलकुद, राष्ट्रको लागि खेलकुद, अनुशासनको लागि खेलकुद, पहिचानको
लागि  खेलकुद” भन्ने मूल नाराका साथ प्रतियोगिता सञ्चालन गरिएको हो ।
कार्यक्रममा भूमिकास्थान नगरपालिकाका १० वटै वडाका वडाध्यक्षहरू, विभिन्न
शाखाका कर्मचारी, विभिन्न विद्यालयका प्रधानाध्यापक, खेल शिक्षक,
सञ्चारकर्मी लगायतको सहभागिता रहेको थियो ।