काठमाण्डाै – चालू आर्थिक वर्षको ६ महिनामा खुद सेवा आय ४३ अर्ब ५३ करोड रुपैयाँले घाटामा रहेको छ । नेपाल राष्ट्र बैंकका अनुसार अघिल्लो वर्षको ६ महिनामा खुद सेवा आय ३५ अर्ब ४३ करोड रुपैयाँले घाटामा रहेको थियो ।
६ महिनामा विदेशीले नेपालमा गर्ने खर्च अर्थात् भ्रमण आय ५ दशमलव १ प्रतिशतले वृद्धि भई ४१ अर्ब ८६ करोड पुगेको छ । नेपाल राष्ट्र बैंकका अनुसार नेपालीले विदेशमा गर्ने खर्च भने झन्डै १० प्रतिशतले बढेर एक खर्ब एक अर्ब ९२ करोड रुपैयाँ पुगेको छ । यसमध्ये शिक्षाका लागि ५६ अर्ब ८३ करोड रुपैयाँ बाहिरिएको छ । अघिल्लो वर्षको ६ महिनामा वैदेशिक शिक्षाका लागि ५८ अर्ब ९५ करोड रुपैयाँ बाहिरिएको थियो ।
यसैबीच गएको असार मसान्तमा २० खर्ब ४१ अर्ब १० करोड रुपैयाँ बराबर रहेको कुल विदेशी विनिमय सञ्चिति साढे १३ प्रतिशतले वृद्धि भई २३ खर्ब १६ अर्ब ८४ करोड रुपैयाँ पुगेको छ । यो नेपाली इतिहासकै सबैभन्दा धेरै सञ्चिति हो । अमेरिकी डलरमा विदेशी मुद्रा सञ्चिति १६ अर्ब ८४ करोड पुगेको छ ।
