८ असोज, काठमाडौं । नेपाली कांग्रेसको पदाधिकारी बैठक कांग्रेस संसदीय दलको कार्यालय सिंह दरबारमा चलिरहेको छ । बैठकमा १४ औं महाधिवेशनको कार्यतालिका र समावेशी प्रतिनिधित्वका विषयमा छलफल भइरहेको सहमहामन्त्री डा. प्रकाशशरण महतले जानकारी दिए ।
कांग्रेसले हिमाली जिल्लामा दशैंअघि जिल्ला अधिवेशन गर्ने र बाँकीमा दशैंपछि अधिवेशनका कार्यक्रम अगाडि बढाउने निर्णय गरेपछि महाधिवेशनको कार्यतालिका प्रभावित भएको छ ।
‘आज बैठकमा अधिवेशनकै समय तालिकाबारे छलफल भइरहेको छ । हिमाली बाहेकका जिल्लाहरुमा दशैंअघि पालिका अधिवेशनमात्रै गर्ने कुरा भएको छ, बाँकी अधिवेशनको मितिबारे छलफल भइरहेको छ,’ सहमहामन्त्री महतले भने ।
उनका अनुसार बैठकमा समावेशी प्रतिनिधित्वको विषयमा पनि छलफल भइरहेको छ । महाधिवेशनमा दलित, मुस्लिम, मधेशी, अल्पसंख्यकहरुको प्रतिनिधित्वका विषयमा कांग्रेसभित्र असन्तुष्टि छ ।
नेपाली कांग्रेसको अझै १३ जिल्लामा वडा अधिवेशन गर्न बाकी छ । यश विषयमा पनि छलफल भइरहेको छ ।
