संयुक्त राष्ट्रसंघको आप्रवासन निकायले मध्यपूर्व युद्धमा फसेका र जोखिममा रहेका आप्रवासीलाई इरानबाट बाहिर निकाल्न पहल थालेको छ । अन्तर्राष्ट्रिय आप्रवासन सङ्गठन (आइओएम) ले गोलाबारी र सामूहिक विस्थापनका कारण इरानमा आप्रवासी अत्यधिक जोखिममा रहेको जनाएको समाचार संस्था एएफपीले जनाएको छ ।
सङ्कटमा परेका सयौँ आप्रवासीसहित अन्य तेस्रो देशका नागरिकलाई पनि सहयोग गर्न आफू तयार रहेको आइओएमले जनाएको छ । आइओएमका पुनर्वास तथा आवागमन व्यवस्थापन निर्देशक डेभिड जोनले जेनेभामा पत्रकारसँग केही आप्रवासीलाई इरानबाट घर फर्कन सहयोग गरिसकेको पनि उल्लेख गर्नुभयो ।
संयुक्त राष्ट्रसङ्घ शरणार्थी निकाय यूएनएचसीआरले अस्ति इरानबाट ३२ लाख मानिसहरू विस्थापित भएका जनाएको थियो । गएको फेब्रुअरी २८ तारिखमा अमेरिका–इजरायलको संयुक्त आक्रमण इरानमा शुरु भएयता युद्धको असर मध्यपूर्व क्षेत्रभर फैलिएको छ । युद्धका कारण इन्धन सङ्कट निम्तिएको छ ।
अमेरिका–इजरायल र इरानबीचको लगातारको युद्धले समुद्री मार्गबाट हुने आपूर्ति श्रृङ्खलालाई ठूलो प्रभाव पारेको छ । विशेषगरी आयात व्यवसायमा जोडिएका क्षेत्र मध्यपूर्व तनावको चपेटामा परेका छन् ।
जसले आर्थिक प्रभाव पारिरहेको छ । इन्धन ढुवानीका लागि रणनीतिक क्षेत्र ‘स्ट्रेट अफ हर्मुज’ बन्द हुँदा तेल र ग्यास उद्योगहरू मात्र होइन, विश्वव्यापी यातायातलाई पनि उत्तिकै असर पुर्याएको छ । समाचार संस्था एएफपीका अनुसार इरानको ‘स्ट्रेट अफ हर्मुज’ प्रभावित हुँदा हजारौँ व्यावसायिक सामान बोक्ने जहाजहरू अवरुद्ध छन् ।
सामुद्रिक यातायात कम्पनी सिएमए सिजिएमका प्रमुख कार्यकारी रोडोल्फ साडेले फ्रान्सेली पत्रिका फिगारोसँग युद्ध लम्बिए थप जोखिम निम्तने बताउनुभएको छ । पछिल्लो मध्यपूर्वको तनावले केही हदसम्म विगतको कोरोना महामारीमा उत्पन्न भएजस्तै खराब अवस्था ल्याएको छ । समाचार स्रोत उज्यालो ।
