जनताको सुखदुःखमा सधैं साथमा छु:उम्मेदवार चौहान

हृदय भुसाल अर्घाखाँची । अर्घाखाँची जिल्लाको छत्रदेव गाउँपालिका का विभिन्न स्थानमा भेटघाट कार्यक्रम गर्दै प्रतिनिधि सभा सदस्य पदका उम्मेदवार राम बहादुर चौहानले आफू जनताको असल सेवक भएको बताउनुभएको छ। घरदैलो तथा मतदाता संघ भेटघाटका क्रममा उहाँले स्थानीय वासीका समस्या, सुझाव र अपेक्षा नजिकबाट सुन्नुभएको थियो।
कार्यक्रममा बोल्दै उम्मेदवार चौहानले जनताको विश्वास नै आफ्नो सबैभन्दा ठूलो शक्ति भएको उल्लेख गर्दै राजनीति सेवा र जिम्मेवारीको माध्यम भएको बताउनुभयो। “म पदका लागि होइन, जनताको सेवा गर्नका लागि उम्मेदवार बनेको हुँ,” उहाँले भन्नुभयो।
स्थानीय नागरिकहरूले सडक, खानेपानी, स्वास्थ्य र रोजगारीका विषय उठाएका थिए। ती समस्याको समाधानका लागि सम्बन्धित निकायसँग समन्वय गरी अघि बढ्ने प्रतिबद्धता उहाँले व्यक्त गर्नुभयो।
उम्मेदवार चौहानले जितेपछि पनि गाउँमै बसेर जनतासँग प्रत्यक्ष सम्बन्ध कायम राख्दै विकास निर्माण र जनहितका कामलाई प्राथमिकतामा राख्ने बताउनुभयो।