अर्घाखाँचीमा वेवारिसे अवस्थामा बिष्फोटक पदार्थ भेटीयो,प्रहरीद्वारा डिस्पोज

हृदय भुसाल अर्घाखाँची । जिल्ला प्रहरी कार्यालय अर्घाखाँचीबाट  कार्यालय प्रमुख दिबश ब. जि.सी.को कमाण्डमा ग्रामीण गस्ती गर्ने क्रममा शितगंगा नगरपालिका–११ बोक्से स्थित पुरानो, कोही नबस्ने गोठ (थारो) मा वेवारिसे अवस्थामा विभिन्न किसिमका बिष्फोटक पदार्थ फेला परेका छन्।
गस्तीका क्रममा फेला परेका बिष्फोटक सामग्रीमा भरुवा बन्दुक २ थान, ग्रिनेट १४ थान, डेटोनेटर १२ थान, प्लास्टिकको पाइप (२५ इन्च लामो लन्चर जस्तो देखिने) ३ थान, ५ लिटरको प्रेशर कुकर बम १ थान, स्टिलको डलु बम १ थान, बिजुलीको तार ४ बण्डल र करिब ५०० ग्राम बारुद रहेको जिल्ला प्रहरी कार्यालयले जनाएको छ।
फेला परेका भरुवा बन्दुक २ थान बाहेक अन्य सबै बिष्फोटक पदार्थहरू नेपाली सेनाको सहयोगमा सुरक्षित रूपमा डिस्पोज गरिएको प्रहरीले जानकारी दिएको छ। घटनाका सम्बन्धमा थप अनुसन्धान भइरहेको जिल्ला प्रहरी कार्यालय अर्घाखाँचीले जनाएको छ।