- साउन महिनाका लागि वाणिज्य बैंकहरूले व्यक्तिगत र संस्थागत निक्षेपको ब्याजदर घटाएका छन्।
- मध्ये १३ वटा बैंकले पुरानै ब्याजदरलाई निरन्तरता दिएका छन् भने बाँकीले घटाएका छन्।
- नबिल र प्रभु बैंकले व्यक्तिगत मुद्दतीमा अधिकतम ४.५५ प्रतिशत ब्याजदर तोकेका छन्।
काठमाण्डाै – वाणिज्य बैंकहरूले प्रदान गर्ने ब्याजदर साउन महिनाका लागि थप घटेको छ । २० वटा वाणिज्य बैंकले सार्वजनिक गरेको नयाँ ब्याजदरअनुसार व्यक्तिगत निक्षेपतर्फको औसत अधिकतम ब्याजदर असारको ४.२५८ प्रतिशत विन्दुबाट घटेर साउनका लागि ४.१६७ प्रतिशत विन्दुमा झरेको छ ।
यस्तै संस्थागत निक्षेपको औसत दर असारको ३.१८ प्रतिशत विन्दुबाट घटेर साउनका लागि ३.११६ प्रतिशत विन्दुमा झरेको छ ।
२० मध्ये १३ वटा बैंकले असार महिनाकै ब्याजदरलाई निरन्तरता दिएका छन् । नेपाल बैंकले व्यक्तिगत ब्याजदर स्थिर राखे पनि संस्थागत निक्षेपतर्फको दरमा १ प्रतिशत बढाएर ४ प्रतिशत पुर्याएको छ । बाँकीले सामान्य घटाएका छन् ।
नयाँ प्रकाशित दरअनुसार साउनमा व्यक्तिगत मुद्दती निक्षेपमा सबैभन्दा धेरै ब्याजदर नबिल बैंक र प्रभु बैंकले अधिकतम ४.५५ प्रतिशत ब्याजदर तोकेका छन् । व्यक्तिगत मुद्दतीमा सबैभन्दा कम ब्याजदर कुमारी बैंक र स्ट्यान्डर्ड चार्टर्ड बैंकको ३.८५ प्रतिशत मात्र रहेको छ ।
