काठमाण्डौ – नेपाली कांग्रेसका सभापति शेरबहादुर देउवा पुस मसान्तभित्र पार्टीको नियमित महाधिवेशन गर्न तयार हुनुभएको छ । विधानतः विशेष महाधिवेशनको माग टार्न नसकिने भएपछि उहाँ नियमित महाधिवेशनको पक्षमा देखिनुभएको हो ।
विशेष महाधिवेशनको सट्टा नियमित महाधिवेशनमै सभापति देउवाको जोड रहेको छ । तर, यसमा नेताहरु विमलेन्द्र निधि र कृष्णप्रसाद सिटौलाले भने पुसमा महाधिवेशन सम्भव नभएको भन्दै असहमति व्यक्त गर्नुभएको छ ।
नेपाली कांग्रेसको केन्द्रीय कार्यसमितिको बैठक भोलि सोमवार दिउँसोसम्मका लागि सारिएको छ । यसअघि हिजो सभापति देउवासँग भएको छलफल निष्कर्षविहीन भएपछि बैठक सारिएको हो । मुख्य सचिव कृष्णप्रसाद पौडेलले बैठक सोमवारका लागि सारिएको जानकारी दिनुभएको हो ।
महाधिवेशनको मितिबारे कांग्रेसमा आन्तरिक किचलो लम्बिएको छ । तर सभापति देउवाले महाधिवेशन कार्यतालिका ल्याउन कार्यवाहक सभापति पूर्णबहादुर खड्कालाई निर्देशन दिनुभएको छ । निधि र सिटौलाको असहमति देखिएपछि थप गृहकार्य गर्न भन्दै कार्यवाहक सभापति खड्काले आजका लागि तय केन्द्रीय कार्यसमिति बैठक भोलिका लागि सार्नुभएको हो ।
कांग्रेसले भोलिको बैठकमा उपस्थित हुनका लागि केन्द्रीय कार्यसमितिका पदाधिकारी, सदस्य, आमन्त्रित सदस्य र सातै प्रदेश कार्यसमितिका सभापतिलाई अनुरोध गरेको छ ।समाचार स्रोत उज्यालो
