निम्बतरु
भावीले एउटा नोटबुक दिएर पठाएको हुँदो हो
पहिलो पन्नामा जन्म
अन्तिम पन्नामा मृत्यु लेखेर
बीचका पन्नाहरु खाली थिए लाग्छ
तर कता हरायो हरायो जाबो!
जिन्दगी अब लखर लखर
खाली पन्नाहरु अधिकांश त केरेरै भ्याइए
केही च्यातिए
केही थिए खाली
आज एउटा कृति लेख्नुथियो
कता हरायो हरायो जाबो!
जिन्दगी अब लखर लखर
केही पन्नामा केही लेखिदिईकी थिई
थिई एउटी त्यल्ले
त्यो पनि रातो अक्षरले
त्यो पनि हेर्नुथियो एकपल्ट
थिए यस्तै करुणा,सहानुभूति र प्रेम
साट्यौं वा एकार्काको नोटबुक
प्रष्ट याद छैन
कता हरायो हरायो जाबो !
जिन्दगी अब लखर लखर
अब मेरो लास मात्रै छ
सक्दैन अब केही गर्न
जिन्दगी अब लखर लखर
