नविन रसाईली अर्घाखाँची । अर्घाखाँचीमा १९ औं राष्ट्रिय धान दिवस तथा असारे रोपाइँ महोत्सव २०७९ सम्पन्न भएको छ । अर्घाखाँचीका विभिन्न स्थानहरुमा रोपाइँ गरेर आज बुधबार मोहोत्सव मनाइएको हो । जिल्लाको सन्धिखर्क नगरपालिकाका कर्मचारी तथा जनप्रतिनिधीहरुले पनि किसान सँगै धान रोपेर मोहोत्सव मनाए । नगरपालिकाले “धान बालीमा जैविक विविधताको उपयोग, आयत प्रतिस्थापन सहयोग” भन्ने मुल नाराका साथ दिवस मनाएको थियो ।
रोपाई मोहोत्सवमा सन्धिखर्क नगरपालिकाका प्रमुख कृष्ण प्रसाद श्रेष्ठले खेतीयोग्य जमिनको संरक्षण, कृषिलाई व्यवसायीकरण गर्नु आवश्यक रहेको बताए । उनले कृषी पेशालाई आधुनिकीकरणमा जोड दिनुपर्ने बताउदै सहरमा बस्ने नयाँ पुस्तालाई खेती प्रणालीका बारेमा जानकारी दिन पनि महोत्सव फलदायी भएको बताए ।
नगरपालिकाका जनप्रतिनिधी, कर्मचारी सँगै स्थानिय किसानले आज असार १५ सँगै धान रोपेर, हिलोमा खेलेर मनाउन पाउदा किसान उत्साहित भएको एक किसानले बताए । धान रोपाइँ सुरु भए पनि सरकारले किसानलाई समयमै मल, बिउको व्यवस्था गर्न नसकेको किसानहरुको गुनासो छ ।
तस्विरः नविन रसाईली
यसैबिच कृषि ज्ञान केन्द्र अर्घाखाँचीले पनि १९ औ राष्ट्रिय धान दिवस तथा रोपाइँ मोहोत्सव २०७९ मनाएको छ । कृषि ज्ञान केन्द्रले सन्धिखर्क नगरपालिका वडा नं. १० बिहारमा रहेको हिमालय कृषि तथा व्यवसायिक पशुपंक्षी फर्ममा किसान सँगै धान रोपेर दिवस मनाएको हो ।
रोपाइँ महोत्सवमा सहभागीहरु असारे भाकामा गित गाउँने, धान रोप्ने, हिलोमा छिरेर टिकटिक बनाउनदेखि सेल्फी खिच्न व्यस्त देखिन्थे । महोत्सवस्थलमा रमाइलो भइरहँदा नजिकैका खेतमा भने किसानले काम गरिरहेका थिए ।
