काठमाडौँ- पूर्वराष्ट्रपति विद्यादेवी भण्डारीले आफूलाई नेकपा एमालेको नेता भन्न मिल्ने बताएकी छन् । उनले अबको आफ्नो लक्ष्य पार्टीको आगामी नेतृत्व (अध्यक्ष) भएको समेत स्पष्ट पारेकी छिन् ।
बिहीबार इमेज टेलिभिजनका पत्रकार जगदीश खरेलसँगको अन्तर्वार्तामा भण्डारीले आफूले सरकारी सेवा-सुविधा परित्याग गरेको जानकारी दिँदै राष्ट्र र पार्टीको हितका लागि राजनीतिमा फर्किएको बताइन् । “व्यक्तिगत पदलोलुपता वा महत्त्वाकाङ्क्षा होइन, राष्ट्रिय आवश्यकताका विषयमा सक्रिय हुन खोजेकी हुँ,” उनले भनिन् ।
केही साताअघि मात्रै सक्रिय राजनीतिमा फर्किएको घोषणा गरेकी भण्डारीको आगामी योजनाबारे सार्वजनिक चर्चा चलिरहेका बेला उनले यस अन्तर्वार्तामार्फत आफ्नो लक्ष्य र प्रतिबद्धता खुलेर राखेकी हुन् ।
पत्रकार खरेलले ‘यो सबै गर्नका लागि तपाईँलाई एमालेको अध्यक्ष बन्नुपर्छ भन्ने हो ?’ भनेर सोधेको प्रश्नमा उनले ‘हो, यस्मा कुनै सन्देह छ र’ भन्ने स्पष्ट जवाफ दिइन्।
